Guneen lagapena, bai doan, bai ezarritako prezio publikoa ordainduz, astelehenetik igandera egingo da 10:15etik 13:45era eta 16:15etik 20:30era.

Nork eska dezake guneak lagatzea?

Erakunde publiko edo pribatuek, elkarteek, enpresek edo pertsona fisikoek.

Nork eska dezake doako lagapena?

Doako lagapena udal arloek eta Elkarteen Udal Erregistroan izena emanda dauden elkarteek eskatu ahal izango dute, bai eta irabazi asmorik gabeko erakundeek ere, baldin eta izaera soziokulturala duten jarduerak burutzeko eskatzen badute.

Nola eskatzen da gunea?

Erabiltzeko eskabideak gutxienez bi aste lehenago aurkeztu beharko dira Kabian horretarako banatuko den eskaera orriaren bidez, hurrengo ordutegi honetan:

Astelehena-asteazkena-ostirala:16:00-16:55
Asteartea – osteguna: 20:05 - 20:55

Alokairuzko lagapenetan, ezarritako zenbatekoa baimena jaso aurretik ordaindu beharko da. Programatutako jarduerak bertan behera geratzeak ez du ordaindutako prezioa itzultzerik ekarriko, erabilera-arauetan ezarritako kasuetan izan ezik.

Zein gune laga daitezke eta zein helburuz?

1, 2 eta 3 tailerrak erabilera anitzeko gelak dira, eta ikastaroak, tailerrak, bilera eta abar egiteko erabiliko dira. 1 eta 2 tailerrak, trenkada baten bidez banatuta, gela bakar bat bailiran erabili ahal izango dira.

Zein bitarteko material ditu Kabiak?

Tailerretan oinarrizko materiala dago: mahaiak, aulkiak (paladunak edo palarik gabeak), armairuak telebista eta bideo-irakurgailua. Aldageletan takila itxiak daude. Material hauek doan erabil daitezke, baina aldez aurretik eskatuta.

Zer gehiago jakin beharko nuke?

Gune bakoitza lagatzeko baldintzak, Zentroa Erabiltzeko Araudian, eta prezio publikoa, urtero ezarria, Kabian eta udalaren webgunean kontsultatu daitezke.

Ludoteka zertan da?

Ludotekaren xedea, besteak beste, umeek jolasean eta jostailuekin aritzeko gune berezia eskaintzea da, non jolastuz ikasi, ondo pasatu eta irudimena eta sormena garatuko duten beste ume batzuekin batera.

Zein egunetan eta zein ordutegitan erabil dezaket?

Ludoteka zabalik egongo da astelehenetik igandera 10:00etatik 14:00etara eta 16:00etatik 20:45era.

Nork eska dezake honen doako lagapena?

Udal arloek, Elkarteen Udal Erregistroan izena emanda dauden elkarteek eta irabazi-asmorik gabeko erakundeek eska dezakete doako lagapena

Nork eska dezake alokairuzko lagapena?

Pertsona fisiko juridikoek eta Elkarteen Udal Erregistroan izena emanda ez dauden elkarteek.

Zein baliabide material ditu ludotekak?

Lokalaren material finkoaz gain, mikrouhina, aldagela eta telebista-irakurgailua erabil daitezke. Azken hauek aldez aurretik eskatu behar dira.

Nola eskatzen da ludoteka?

zozketaren bidez (2 urtero), epeak aurrerago iragarriko dira.

Zer gehiago jakin beharko nuke Kabiaz?

Giltzak jaso eta itzuli. Giltzak erabili aurreko egunean jasoko dira Kabian eta berau erabili eta hurrengo lehen lan-egunean itzuliko dira aipatutako ordutegietan.

Lokalak garbi geratu beharko dira erabili ostean. Beraz, lokaletatik alde egin aurretik, eskatzaileek garbiketa egin, altzariak ordenatu, zarama batu eta atera eta bai erabilitako ludoteka edo tailerraren atea, bai Kabian sartzeko ate nagusia itxiko dituzte, baldin eta barruan beste inor ez badago.

Erabiltzaileek ezohiko zerbait antzemanez gero, Kultura eta Euskara Arloan jakinarazi beharko dute, bulegoan bertaratuz edo aipatutako telefono, helbide edo posta elektronikoaren bidez. Iradokizunak ere horien bitartez egin ahal izango dira.